Verið velkomin á sýninguna ‘JÖRÐ’ í Epal Gallerí á Laugavegi 7 (kjallaranum í Epal verslun).

Ingibjörg Torfadóttir ljósmyndari ákvað eftir tvö leirrennslunámskeið hjá Myndlistaskólanum í Reykjavík að skrá sig í diplómanám í keramik hjá sama skóla. Strax í upphafi kviknaði mikill áhugi á íslenska leirnum og eiginleikum hans en margir telja hann vera ónothæfan vegna þess hversu ung jarðsaga Íslands er. Íslenskur leir þolir yfirleitt ekki háa brennslu, bráðnar gjarnan og er því tilvalinn í glerunga. Þetta vakti mikinn áhuga hjá Ingibjörgu enda var íslenskur leir mikið notaður á Íslandi áður fyrr þegar innflutningur á leir var bannaður. Ingibjörg lagði því af stað í stórt rannsóknarferðalag þar sem hún safnaði leir frá Borgarfirði Eystra til að sjá hversu sterkur hann væri og hvort hann gæti í raun þolað hábrennslu án þess að bráðna.

Á sýningunni má sjá afrakstur rannsóknarinnar ásamt öðrum leirmunum úr steinleir og postulíni sem Ingibjörg bjó til í námi sínu við Myndlistaskólann í Reykjavík. Ásamt keramikmunum sýnir Ingibjörg einnig ljósmyndir en þær eru allar frá þeim töfrandi stað, Borgarfirði Eystra.

Til að fylgja Ingibjörgu á instagram smelltu þá HÉR

Sýningin er frá 4. – 25. júní og er opin frá 10-19 mánudaga – föstudaga, 10-18 laugardaga og 11-18 á sunnudögum.

Við hvetjum alla eindregið til að mæta, sjón er sögu ríkari!