Sigrún Jóna Norðdahl er nýútskrifaður keramikhönnuður frá University of Cumbria í Englandi en þar áður lauk hún Mótun í Myndlistarskólanum í Reykjavík. Í ár mun Sigrún taka þátt í sýningu Epal á Hönnunarmars og er hún mjög spennt fyrir þeim viðburði. “Ég lít á þennan viðburð sem alveg frábært tækifæri til þess að koma vöru minni á framfæri í alveg frábærum hópi hönnuða. Innblástur minn kemur að miklu leyti frá mínu daglega umhverfi og því hvernig ég skynja það. Ég er frekar forvitin að eðlisfari og næm á umhverfi mitt og er alltaf eitthvað að spá og spekúlera. Ég hugsa mikið um það samband sem við eigum við hluti í kringum okkur og hvort hlutir geti ekki bæði verið fallega hannaðir en á sama tíma haft eitthvað hlutverk í að tengja okkur betur við umhverfi okkar. Notagildi er mér einnig mjög mikilvægt og hvernig það tvinnast saman við fagurfræði hlutarins, það er ekki endilega svo einfalt að láta þessa tvo eiginleika mætast þannig að útkoman sé góð en þegar vel tekst til er það svo spennandi.”

Línan sem Sigrún sýnir í Epal nefnist Handle It og samanstendur af skálum, diskum og ílátum úr postulíni sem ætluð eru til framreiðslu á mat. Handföng spila stórt hlutverk á sumum hlutanna og þau ásamt sérstöku útliti kannanna hafa það að markmiði að hleypa samræðunum af stað við matarborðið og hvetja matargesti til þess að eiga meiri samskipti við hvorn annan við matarborðið.

Sigrún stefnir ótrauð áfram í þessum geira og er með ýmislegt á prjónunum má þar meðal annars nefna samsýningu á Skriðuklaustri auk þess sem hún er nú þegar farin að leggja drög að nýjum hlutum sem hún byrjar að vinna að um leið og Hönnunarmars líkur.

Hönnunarmars í Epal hefst með opnunarpartý þann 11. mars frá kl. 17-19. Viðburðinn á facebook má sjá -hér. 

Vertu velkomin á Hönnunarmars í Epal.

Hjalti Axelsson lærði vöruhönnun við Listaháskóla Íslands 2006-2009 og lauk Magister gráðu í Iðnhönnun við Universtiat fur angewandte kunst í Vínarborg 2014 þar sem hann býr og starfar sem hönnuður. Á HönnunarMars sýnir hann fjölnota húsgagnið The lazy butler. Það má nota bæði sem stól og borð, hægt er að hengja föt á það sem og geyma í því persónulega muni.

Þegar fólk flutti úr sveitunum til borgarinnar á tímum iðnbyltingarinnar á árunum 1760-1870 tók að fjölga í borgunum og þær stækkuðu óðum. Það er áhugavert að skoða hvaða hluti fólk tók með sér, segir Hjalti.

“Kistillinn er persónulegast hluturinn sem fólkið úr sveitunum átti og hafði með sér og var ein verðmætasta eign þeirra og gegndi líka hlutverki borðs og sætis á löngum ferðalögum eða inni á heimilinu. Ég hanna húsgagn sem innifelur þetta persónulega rými og þá umbreytingu sem verður á einstaklingi við það að koma heim til sín. Þegar hann fer úr borgarlegu fötunum sínum og slakar á.”

“Ljósastaur The lazy butler er mín tenging við þá framþróun sem fylgdi iðnbyltingunni þegar götur borganna urðu upplýstar sem og tenging við heimkomuna að kveikja ljós og hengja af sér. Bakkinn í húsgagninu er ætlaður fyrir það sem við erum með í vösunum t.d. símann, peningaveskið, smáaura og því um líkt. Stærra hólfið gæti til dæmis geymt höfuðföt og hanska. En hver veit hvað er geymt undir yfirborðinu.”

 Hönnunarmars í Epal hefst með opnunarpartý þann 11. mars frá kl. 17-19. Viðburðinn á facebook má sjá -hér. 

Epal mun í ár sýna áhugaverða hönnun eftir fjölbreyttan hóp hönnuða jafnt ungra sem reyndari.

Vertu velkomin á Hönnunarmars í Epal.

LÝSA er viðarlampi með mjúkum línum í naumhyggjustíl. Hönnuðurinn losaði sig við það sem ekki er nauðsynlegt og hélt eftir því allra mikilvægasta. Eins eftirtektarverð og LÝSA er, þá hefur hún kallað fram tilfinningar áþekkar “ást við fyrstu sýn”. LÝSA er lampi sem tekur sig ekki of alvarlega í útliti en er samt úthugsuð og sniðug hönnun.

Julie Gasiglia er 24 ára franskur hönnuður sem hefur búið á Íslandi í tvö ár. Snemma varð ljóst hvar áhugi hennar lá, þar sem hún varði mestum tíma við að teikna og hanna hluti. Julie útskrifaðist árið 2011 sem innanhússhönnuður frá IPESAA í Montpellier í Frakklandi. Eftir útskrift starfaði hún sem aðstoðarmanneskja fyrir arkitektastofuna Aplus í Montpellier árin 2011-2012 og svo sem vöruhönnuður hjá Escaliers Décors árin 2012-2013. Í mars 2013 flutti hún til Íslands og hefur síðan þá unnið sem verktaki við innanhússhönnun, vöruhönnun og grafíska hönnun, bæði á Íslandi sem og í fjarverkefnum fyrir frönsk fyrirtæki.

 Hönnunarmars í Epal hefst með opnunarpartý þann 11. mars frá kl. 17-19. Viðburðinn á facebook má sjá -hér. 

Vertu velkomin á Hönnunarmars í Epal.

Á HönnunarMars í Epal sýnir Ingibjörg Ósk Þorvaldsdóttir uppáhellingarkönnuna Uppáklædd – All dressed up. Um gripflöt postulínskönnunnar er vafið annað hvort tréperlum eða bandi og dregur hún nafn sitt af klæðningunni. Klæðningin gerir hverja könnu einstaka, gefur gott grip og kemur í veg fyrir bruna.

Grunnhugmyndin að kaffikönnunni Uppáklædd á sér upphaf í snúningi af öllu tagi, snúningi tvinnakeflis, leirrennibekks, hringsnúningi vatnsbununnar þegar hellt er upp á kaffi. Kannan er samsett úr fjórum hlutum, könnu, trekt, disk og loki. Þegar kannan er ekki í notkun þá sómir hún sér vel, tekur líðið pláss þar sem allir hlutir raðast saman og mynda eina heild.

 Ingibjörg Ósk Þorvaldsdóttir er fædd í Reykjavík 19.desember 1956. Hún útskrifaðist sem grunnskólakennari frá KHÍ 1981 með sögu og textílmennt í vali og að því loknu bætti hún við sig smíðavali. Ingibjörg hefur aðallega unnið sem umsjónarkennari í meira en 30 ár en oft samhliða þeirri kennslu hefur hún kennt smíði og textíl. Eftir útskrift frá KHÍ var löngun hennar að fara í Myndlista-og handíðaskólann en að stofna fjölskyldu og eignast börn varð yfirsterkara. Þó hvarf löngunin aldrei frá henni og skólaárið 2012 -´13 fékk Ingibjörg námsleyfi og hóf þá nám í Mótun við Myndlistaskólann í Reykjavík. Ákvað hún svo að ljúka diplómanámi en það er tveggja ára nám og lauk hún því síðast liðið vor. Jafnframt kennslunni í vetur hefur Ingibjörg komið sér upp vinnuaðstöðu í Íshúsi Hafnarfjarðar ásamt fleirum.

 Hönnunarmars í Epal hefst með opnunarpartý þann 11. mars frá kl. 17-19. Viðburðinn á facebook má sjá -hér. 

Vertu velkomin á Hönnunarmars í Epal.